DON JOSÉ MARÍA LÓPEZ RANCAÑO, ALCALDE DO CONCELLO DE ABADÍN (LUGO), ao
abeiro do disposto no artigo 21.1.e) da Lei 7/1985, do 2 de abril
FAGO SABER
Ante a situación na que aínda nos atopamos “situación de emerxencia sanitaria de interese galego”, efectuada polo Consello da Xunta do 13 de marzo de 2020, en aras de garantir a seguridade pública e saúde pública do conxunto da veciñanza do Concello de Abadín, e estando próxima a noite de San Xoán (23 de xuño) na que é tradición o encendido de innumerables fogueiras, en virtude do artigo 36.5 da Lei 3/2007, de prevención e defensa contra os incendios forestais de Galicia.
ESTABLÉCENSE as seguintes normas para a súa realización:
- Queda prohibida a realización de fogueiras en espazos públicos.
- Poderán realizarse en espazos privados, debendo respectarse en todo caso as medidas de seguridade e hixiene establecidas no Real Decreto-Lei 21/2020 do 9 de xuño e na Resolución de 12 de xuño da Secretaría Xeral Técnica da Consellería de Sanidade.
- Non se queimarán aceites, líquidos inflamables, envases con gases, nin outros recipientes ou obxectos que poidan conducir á explosión do seu contido e/ou materiais.
- Prohíbese queimar rodas ou cubertas de goma, plástico ou calquera material derivado de hidrocarburos, así como materiais ou productos contaminantes ou tóxicos.
- Non se poderán facer fogueiras en lugares próximos a tendidos eléctricos, inmobles, depósitos que puidesen conter material inflamable, masas arbóreas ou calquera outro no que poidan crearse situacións de perigo.
- Non poderán realizarse as fogueiras se as condicións metereolóxicas dificultan o seu control, especialmente non suposto de forte vento. Así mesmo, se unha vez iniciada a fogueira comeza a facer vento forte deberá procederse de inmediato a apagar o lume.
- Unha vez rematada a queima, o responsable ou responsables e organizadores de cada fogueira encargaranse de retirar os restos que queden e poidan ocasionar perigo.
- En caso de incumprimento do indicado, ou de queixas xustificadas da veciñanza, procederase polo Servizo de Extinción de Incendios a sofocar de inmediato a fogueira.
Cada fogueira terá un ou varios responsables que comunicarán nas Oficinas Municipais, presentando a tal efecto o impreso que se facilitará no Rexistro do Concello e na sede electrónica municipal, indicando o lugar da queima e comprometéndose á adopción das medidas de seguridade precisas.
O prazo máximo para a comunicación no Rexistro presencial ou telemático será ata as 14:00 horas do día 22 de xuño de 2020.