Onte iniciaronse as Xornadas de Coopertivismo Agrario organizadas polo Concello de Abadín. A xornada de onte, impartida polo micólogo Antonio Paz, baseouse nun monográfico sobre o mundo das setas, tanto dende o punto de vista da súa comestibilidade como das técnicas de conservación máis apropiadas a cada especie.

A xornada de hoxe centrarase na fiscalidade e a financiación das cooperativas, na normativa de prevención de incendios e na análise da situación do grelo de Abadín e as súas posibilidades dende o punto de vista do cooperativismo.

O Concello de Abadín será un dos primeiros municipios en poñer en marcha o programa Xantar na Casa unha vez asinado o convenio co Consorcio Galego de Servizos de Igualdade e Benestar.

Este programa proporcionará un servizo de comida a domicilio orientado ás persoas maiores e/ou dependentes. O obxectivo deste innovador servizo é mellorar a calidade de vida dos seus beneficiarios achegándolles ás súas casas comidas preparadas para os sete días da semana. O menú estará composto dun primeiro prato, segundo prato e postre.

O Concello de Abadín anuncia a próxima apertura do Centro de Día abadinense. Despois de que se finalizasen as obras de acondicionamento e unha vez realizada a selección do persoal cualificado o Centro de Día de Abadín abre as súas portas.

Coa apertura deste centro o Concello de Abadín cumpre un dos compromisos adquiridos para mellorar a calidade de vida dos nosos maiores, das persoas en situación de dependencia e dos familiares dos mesmos. Todas aquelas persoas que precisen máis información ó respecto poden solicitala nas dependencias municipais.

Unha vez máis o Concello de Abadín e a Consellería de Medio Rural uníronse para mellorar o grelo abadinense mediante a súa Investigación e Desenvolvemento (I+D). Despois de que Medio Rural lle entregase ó Concello de Abadín tres tipos de semente con propiedades xenéticas diferentes sería o propio Concello quen se poría en contacto con dúas produtoras do municipio para sementalas.

As produtoras, que participan na Expogrelo de Abadín, son Orsita Sierra e Marina Cendán. Orsita vive na parroquia de Abeledo que está ubicada nunha zona de montaña; Marina vive noutra parroquia abadinense onde as condicións climatolóxicas son diferentes, isto é, na chaira de Baroncelle. As conclusións desta investigación saberanse cando se analice a evolución das diferentes sementes nestes microclimas diferenciados.

Por outra banda, a Consellería de Medio Rural ten previsto aprobar este ano un regulamento de protección transitoria da Indicación Xeografica Protexida (IXP) “Grelos de Galicia”, co obxectivo de que este produto poida comercializarse con este selo de calidade diferenciada dentro do mercado estatal. O Concello de Abadín está a traballar intensamente neste proxecto debido ás expectativas comerciais que se lle abren a un grelo de calidade suprema coma o abadinense.