Un total de 24 alumnos remataron no día de onte un curso de Benestar Animal que se estivo celebrando nas instalación da actual Biblioteca Municipal. O grupo de profesores deste curso estivo composto por veterinarios e xuristas expertos que desenvolveron a normativa vixente relacionada co tratamento de animais.

Debido á grande demanda de persoas interesadas en realizar outra actividade formativa sobre Benestar Animal comezará o vindeiro luns 31 de maio un novo curso. Aquelas persoas que superan as diferentes probas de coñecemento que se realizan ó longo do curso obteñen un título que lles permiten realizar, entre outras cousas, o transporte de animais, aspecto que é moi importante nas súas tarefas profesionais.

Unha quincena de ciclistas (club ciclista A Nosa Galicia) cuia residencia se atopa en Suiza, pero que unha boa parte deles teñen as súas raíces en Abadín, fixeron o pasado xoves 20 de maio unha escala en Abadín na súa volta do Camiño de Santiago. Estes peregrinos, que á súa chegada a Abadín foron recibidos con aplausos, mantiveron un encontro co alcalde que os apoiou dende un principio nesta iniciativa. Despois de tomar uns aperitivos e de que o grupo de ciclistas saudase a familiares que residen en Abadín continuaron co seu periplo hacia os Lagos de Covadonga.

Este grupo recorreu o Camiño de Santiago pola Ruta Francesa dende Suiza ata Fisterra para, posteriormente, volver ata os Lagos de Covadonga antes da súa volta a casa. Esta proeza tivo unha duración total de 21 etapas.

Un grupo de abadinenses están a realizar o Camiño de Santiago dende Abadín. O pasado domingo, 2 de maio, tivo lugar a primeira etapa entre Abadín e Vilalba, con saída dende o albergue de peregrinos de Gontán, para ganar o Xubileo neste Ano Santo.

As etapas desenvolveranse as mañás dos domingos e constarán dun total de sete.  As idades dos participantes é moi variada xa que van de entre os 20 e os 85 anos.  O avituallamento e coche de apoio están a ser proporcionados polo Concello de Abadín que é o organizador desta iniciativa.

As Redes Sociais (Facebook, Tuenti), os Blogs e o Photoshop son as liñas de básicas da programación dos cursos de Internet que o Concello de Abadín vén de poñer en marcha onte luns 3 de maio. Debido ó grande éxito nas incricións, xa que a temática a tratar é de máxima actualidade, o Concello vai realizar un total de 3 cursos para acoller ó total dos inscritos. Nestes cursos trataranse os “pros” e os “contras” dunhas Redes Sociais que cada vez forman máis parte da linguaxe dos internautas.

Por outra banda, o vindeiro 10 de maio comezará un curso de Benestar Animal que formará a unha treintena de gandeiros, agricultores e transportitas de gando.

O Concello de Abadín, despois de competir con outros 400 concellos de España, foi escollido para poñer en marcha a segunda fase do Proxecto 060, un servizo que pretende axudar ós cidadáns a familiarizarse co uso do DNI electrónico e a realización de trámites e xestións coas distintas administracións públicas a través das oficinas, o teléfono e a web de 060, portal da Administración Xeral do Estado.

No ámbito galego soamente un total de 13 concellos, entre os que está Abadín, foron seleccionados para poñer en marcha este achegamento de servizos telémáticos á poboación. Co gallo de levalo a cabo vanse impartir unha serie de talleres co seguinte itinerario:

Días: Martes 2 de marzo ás 20:00 h

Xoves 4 de marzo: 11:00 h e ás 20:00 h

Lugar: antiga cámara agraria de Abadín

A asistencia a estes talleres están orientados a todos os públicos e dun xeito totalmente gratuito xa que este proxecto está financiado polo Ministerio da Presidencia e promovido polo Ministerio de Industria, Turismo e Comercio e Red.es.